As xornadas sobre dixitalización reivindican un plan estratéxico

Os beneficios e utilidades que ten para a sociedade a dixitalización da información que repousa en museos, bibliotecas, arquivos e na propia administración foron algúns dos temas que se debatiron durante dous días nas xornadas Converxencia dixital das institucións da memoria, organizadas polo Consello da Cultura Galega e que se clausuraron esta mañá. Os especialistas presentes na cita reivindicaron a necesidade dun plan estratéxico da información que xunte os esforzos e iniciativas que "ata o de agora se fixeron de xeito illado e descoordinado", segundo afirmou Gabriel Quiroga membro do comité científico organizador.



As xornadas estiveron enfocadas desde un punto de vista práctico, encamiñado a coñecer as experiencias que xa están en marcha en centros que traballan con patrimonio cultural nacido dixital, centros xa existentes que teñen que dixitalizar o seu patrimonio, e arquivos municipais ou estatais. Tamén houbo espazo para reflexións teóricas onde os expertos incidiron en que a conservación e difusión de recursos documentais van unidos a través da dixitalización, así o persoal das bibliotecas especializadas, caracterizadas pola diversidade de recursos documentais "deben coñecer os pasos e os mecanismos existentes para ir da conservación á difusión: desde as normas de dixitalización á suba na rede dos recursos documentais".

Nesta xuntanza analizóuse o panorama actual que ten que ver coa selección, adquisición, tratamento, acceso e preservación no tempo do patrimonio. Pola súa banda, María Manuela Pinto, da Facultade de Letras da Universidade do Porto, destacou o labor da tecnoloxía para a preservación e difusión de contidos no relatorio Da institución á preservación da memoria: a mudanza sobre un novo paradigma.

Internet e a dixitalización

Nos últimos anos proliferaron as iniciativas de software, habitualmente libres e gratuítas, que permiten a arquivos, bibliotecas, museos, artistas ou particulares almacenar dixitalmente fondos documentais, xestionalos e compartilos cos usuarios a través da rede. Neste contexto Ciro Llueca da Filmoteca de Cataluña impartiu a conferencia As plataformas dixitais, oportunidade (con segundas intencións) para a difusión do patrimonio cultural.

Pola súa banda, Mar García Miraz integrante do grupo de traballo do Proxecto de cooperación transfronteiriza ARPAD, da Xunta, pechou a xornada destacando o papel que ten o Arquivo Dixital de Galicia na conservación e difusión do patrimonio documental conxunto, na habilitación de servizos dixitais e na eliminación do papel nas relacións administrativas na Eurorrexión Galicia-Norte de Portugal.