Vivenda
O xurado concedeu o premio ex-aequo a Manuel Jorreto, por Vivenda Unifamiliar / Urbanización Pazo Ramirás / Ourense e a Tercero Derecha Arquitecturas por unha vivenda unifamiliar en Xuanzo (Abegondo, A Coruña).
"Valorouse a precisión e elegancia do obxecto, o acertado uso dos materiais e o seu rigor construtivo, a súa contención volumétrica, a calidade dos espazos interiores e o tratamento dos exteriores, e o diálogo cun lugar do que ambos os dous, vivenda e paisaxe, resultan beneficiados".
Sobre o proxecto de Terceroderecha Arquitectos, o xurado considera moi destacable a valentía e o carácter experimental dunha proposta que se interna no século XXI sen recorrer a antecedentes formais claros.
Rehabilitación
Emilio Rodríguez Blanco: Rehabilitación integral de vivenda unifamiliar / Portanova / Coeses (Lugo).
A decisión de complementar o corpo orixinal cunha peza actual sen concesións, profundamente meditada e medidas, unida á naturalidade nada afectada do xesto, resulta nun brillante exercicio de arquitectura, discreto e dunha harmonía conmovedora.
Equipamentos
JOSÉ CARLOS SEOANE GONZÁLEZ CENTRO SOCIAL E DE OCIO BIOSAUDABLE |Eirexa |Oleiros |Ribeira |A CORUÑA
O xurado quere subliñar a sensibilidade no uso dos materiais, na exploración do feito construtivo como expresión da arquitectura, reinterpretando formas e materiais e recorrendo a novas técnicas cando se considera oportuno. O traballo coas texturas e a luz é outra das grandes virtudes dun proxecto sensible e de marcado carácter experimental.
Interiorismo e reforma interior
VILLACÉ Y COMINGES ARQUITECTOS ADAPTACIÓN DE LOCAL PARA ACTIVIDADE DE CAFETERIA |VIGO
O xurado destaca a elegancia dunha intervención sobria e sen artificios, que encontra ocasión para interpretar e matizar o estilo "Art-Decó" do edificio en que se integra, renunciando á autonomía expresiva que habitualmente se dá neste tipo de programas
Arquitecturas efémeras
JORGE GARCÍA ANTA | FERNANDO EIROA LORENZO | FRANCISCO XABIER BARRAL FERNÁNDEZ (estudante de arquitectura) | REBECA EIRAS BOHORQUE (estudante de arquitectura) ORDENACIÓN FESTIVAL DO NORTE 2014 |Varadoiro do Xufre | ILLA DE AROUSA
Nesta obra o xurado estimou a capacidade para modelar un espazo e propoñer diferentes usos e ámbitos utilizando exclusivamente módulos de palés de madeira. Tamén o acerto á hora de extraer posibilidades expresivas, ao facelos traballar como peche a xeito de celosía, ao compoñer estruturas de certa dimensión e ao incorporar elementos referenciais e de sinalización.
Baixo custo
CASTROFERRO ARQUITECTOS EL REFUGIO | VILABOA
A reflexión sobre o hábitat mínimo convértese neste caso na elaboración dunha peza precisa e optimista, concibida para un proceso de prefabricación industrial, formalmente contida e versátil no uso e a localización, e que o xurado considerou como moi interesante. O acertado uso dos materiais e o esmerado deseño das pezas que o compoñen, contrasta co carácter xenérico e frío que pode chegar a presentar a construción seriada.
Divulgación e investigación
RUBÉN ULLOA MONTES | LUIS SANTALLA | ALBERTO FORTES | JUAN MIGUEL SALGADO | DARIO VALLINA | ADRIÁN CAPELO | IAGO VALVERDE | OMAR RODRÍGUEZ | ESTEBAN VIGO | MIGUEL PICADO | IAGO CASABIEL
ARQUITECTURADEGALICIA.EU |PÁXINA WEB | GALICIA
Asumindo a eficacia da ferramenta web como vehículo para a divulgación e o coñecemento, o xurado decidiu premiar a arquitecturadegalicia.eu destacando a súa claridade expositiva, o seu carácter aberto e o esforzo na presentación e actualización dos contidos. Unha iniciativa loable para tomar conciencia e dar a coñecer a arquitectura galega dentro e fóra do noso país.
Proxecto fin de carreira
PABLO LÓPEZ PROL ESTADIO OLÍMPICO NA RIBEIRA DO MANZANARES | MADRID
O xurado destaca a solvencia demostrada polo autor ao asumir un proxecto de escala tan complexo como o dun estadio, o esforzo de integración paisaxística e de rexeneración do ámbito fluvial.
