As cinco do Festival Atlántica

Mañá xoves comeza a terceira edición do Festival Atlántica de Narración Oral, un dos eventos máis importantes de Galicia dedicados ás historias contadas. A programación durará unha semana pero pedímoslle á directora do Festival, Soledad Felloza, unha selección de “imprescindibles” cos que disfrutar das historias orais do mundo e do noso contexto cultural atlántico.

Soledad Felloza, narradora oral e directora do Festival, advirte inicialmente que “é moi difícil escoller” xa que o Festival está pensado como “un pequeno conxunto de grandes profesionais”. Para facer esta selección, Sole Felloza propón un convite a coñecer a narradores orais do estranxeiro, que é moi difícil de ver en Galicia, ademáis das propostas galegas.

1. José Luis Gutiérrez “Guti”
Contador da raia de Zamora, da comarca de Sanabria. Guti percorre as cociñas de toda a súa comarca, coñece a todas as persoas des aterra con todo detalle e conta as súas historias, falando, bailando, tocando a gaita. Todo iso ponno en escea para o espectador. É como un “home sen tempo”. E o narrador que non se debera perder nunca.

12 de marzo. Xoves.
20.30h. José Luís Gutiérrez “Guti” (Zamora) Contos Raianos. Dado Dadá. 6 €.

2. Yoshi Hioki.
Estamos falando dun narrador que investigou a tradición oral xaponesa e como el é pintor e fotógrafo conta toda esa tradición coma quen vai facendo pinreladas no aire. Ten un humor finísimo, delicado. O seu xeito de narrar segue as pautas da tradición oral xaponesa: vaite envolvend no que ao principio é como un pequeño espazo que se vai facendo grande a medida que el conta.

14 de marzo. Sábado.
12.00h. Yoshi Hioki. Contos populares do Xapón. Centro Sociocultural de Santa Marta. Público infantil. De balde.
15 de marzo. Domingo.
19.00h. Yoshi Hioki. Contos populares do Xapón. Zona C. 6 €.

3. Patricia McGill
Esta uruguaia é unha mestura de brasileiros, escoceses, irlandeses e italianos. O seu espectáculo é unha viaxe polo Atlantico, dunha beira a outra. Conta historia de vacas nos tellados, de paxaros que falan, de mulleres que viven na Lúa. Como di ela: “da miña canción fixen unha capa recuberta de bordados”. Ao Festival Atlántica esa Irlanda que un dos seus devanceiros achegou á familia.

16 de marzo. Luns.
21:00h. Patricia McGill (Uruguai). Paisajes de la Irlanda que me visita. Club Dado Dadá. 6€.

4. Avelino González
Partindo da base de que é difícil escoller un galego polo alto nivel que temos, eu destacaría a Avelino González, porque é un narrador que patea Galicia para vivir de preto as historias que vai contar. Non coñezo ningún narrador que sexa como Avelino, no que cada vez que está traballando dunha historia perséguea polo mapa ata atopar todo o que precisa: os sabores, as imaxes, as persoas…vai procuralo todo para botalo no escenario.

17 de marzo. Martes.
21.00h. Avelino González. Historias tenras e canallas. Zona C. 6 €.


5. Ana Lage
É unha investigadora dos contos, danzas e versos de amor do Miño, e con este traballo percorre medio mundo facendo bailar e cantar á xente como se facía na súa terra. Cremos que pode ser un peche de festival realmente moi divertido, para rir, para cantar e para bailar.

19 de marzo. Xoves.
22.00h. Feche do Festival Atlántica 2015. Ana Lage (Portugal). Jogos da vida. A Nave de Vidán. 6€.