Ás 20:00 horas de hoxe, 18 de novembro, a libraría coruñesa Linda Rama acollerá a presentación de Apiario. Este novo proxecto literario chega da man das poetas Antía Otero e Dores Tembrás e nace coa intención de combinar a edición coa formación na escrita. Así, no primeiro destes ámbitos, a iniciativa arrincará con tres coleccións, Cera Labrada, de poesía, Niño de Abella para público infantil e Abella Mestra, centrada en ensaio e divulgación. Os primeiro títulos que verán a luz son Celebración, de Gonzalo Hermo e Porque Cuqui non quere ir á lavadora. Conto MOI IMPORTANTE para lerlles aos maiores antes de durmir, de María Lado, con ilustracións de Yanina Torres Tuirán.
