Un novo punto de encontro para abordar cuestións comúns a Galicia e Portugal. Este é o espírito co que nace Conversas na raia, un novo ciclo que o Consello da Cultura coorganiza coa Universidade do Minho. A Casa Museu de Monção acolle este sábado a primeira edición do programa, que se centra na temática As fronteiras políticas a coincidir cos 150 anos do Tratado España-Portugal que fixou a raia. O presidente do Consello da Cultura, Ramón Villares, xeógrafos como Rubén Lois e Álvaro Domingues e historiadores como Pegerto Saavedra e José Viriato Capela abordarán cuestións como o iberismo, o proceso de fixación de fronteiras e a relación entre Galicia e Portugal na Idade Moderna. Segundo adianta o Consello da Cultura, para vindeiras edicións a iniciativa pretende tratar ámbitos como a música, a antropoloxía ou as festas populares, entre outros.
