¿Cal era a proposta?
Dun xeito rápido, pódese dicir que é un cambio máis simbólico que real sobre o emprego das palabras ou a ortografía. Á hora de escribir non se van producir grandes modificacións a como o facemos agora. Pero aumenta o número de opcións sobre como podemos escribir as cousas. E esas opcións son as simbólicas. Por exemplo, se entenderá como 'normativo' escribir 'Galiza' no canto de 'Galicia'.
¿Por que se quería cambiar?
A normativa oficial do galego estivo sometida a grandes discusións dende que en 1970 a Real Academia Galega, que é quen ten competencias nesta materia, aproba unha normativa estándar. O motivo destas discusións era, e é, a relación do galego co portugués. ¿É o galego un idioma de seu?¿É unha variante dialectal do tronco común galego-portugués? A discusión actual que provocou esta iniciativa tenta por de acordo a aqueles que defenden a normativa oficial e os que defenden unha postura de 'mínimos' en relación co portugués. Para saber máis, podes consultar o artigo de Serafín Alonso sobre esta materia.
¿Quen promoveu a reforma?
Basicamente, os departamentos de galego das tres universidades, o Instituto da Lingua Galega, a segunda máxima autoridade na nosa lingua despois da Real Academia, e diferentes entidades asociativas que defenden e empregan o galego de 'mínimos'. Os reintegracionistas de 'máximos' non subscriben o acordo.
¿Cal era o obxectivo destes grupos?
Varios: ampliar a base social do galego, xa que as asociacións e diferentes entidades que promoven o galego de 'mínimos' son moi influíntes e activas na sociedade galega. Un acordo deste tipo ampliaría, segundo estes grupos, o consenso no ensino e na sociedade en xeral arredor da lingua.
