Toda Galicia ferve coa celebración do Día das Letras

Como era de agardar, a celebración do Día das Letras Galega está a concitar múltiplas actividades por todo o país. A Real Academia Galega celebrará mañá unha sesión plenaria extraordinaria e aberta na Casa Habanera de Guitiriz e en homenaxe a Xosé María Díaz Castro, poeta homenaxeado este ano. Canda a este evento, a vila acollerá actividades como recitais poéticos ou un concerto da banda de música a lembrar o seu ilustre veciño.

Entre as múltiples propostas que se desenvolverán ao longo do día, en Compostela a banda de música estreará unha obra inédita de Pascual Veiga, mentres a asociación A Gentalha do Pichel celebrará a súa Festa do Dezassete e enterrará unha cápsula do tempo. Na mesma introduciranse textos coas visións de diferentes persoas sobre como será a situación da nosa lingua en 2050, ano previsto para que se abra a caixa.
Canda a estas, están previstas iniciativas xa anunciadas como o programa Maio de Lingua en Lugo ou o Festiletras de Ponteceso, que se suman a unha programación que enche o país de actos.