O museo na casa (I)

Unha fiestra ao mundo pero tamén a nós mesmos. O CCG comeza a dispoñibilizar as súas exposicións de divulgación da cultura galega no Google Cultural Institute, un repositorio cultural internacional no que a cultura e a lingua do país xa convive coas coleccións de moitos dos centros culturais máis relevantes do mundo. Desta volta, propoñémoste un percorrido por tres das nosas exposicións orientadas ao mundo da emigración.

Nós mesmos.
A exposición Nós mesmos detíñase no fenómeno do asociacionismo galego na emigración, sobre todo americana. As sociedades de emigrantes foron as principais institucións de apoio e vertebración dos milleiros de galegos que tiveron que marchar á procura de novas oportunidades. A exposición vaise detendo na conformación, estrutura, traxectoria e simboloxía destas entidades que os galegos foron constituíndo, de acordo a pequenas e grandes identidades.

Luces de Alén Mar
A exposición Luces de Alén Mar detense, precisamente, na obra benéfica, cultural e educativa -sobre todo esta última- que os emigrantes galegos, agrupados en confrarías, ou os magnates da emigración, a través da filantropía, realizaron en Galicia. Sobre todo escolas, estendidas por todo o país, para que os nenos puideran ser formados de acordo coas últimas tendencias do ensino, da hixiene e da alimentación (a principios do século XX).

Un canto e unha luz na noite. Asociacionismo Cultural en Galicia (1961-1975)
Ao asociacionismo cultural que agromou en Galicia no tardofranquismo debémoslle, en certo xeito, moito do que foi a cultura galega nas primeiras décadas da democracia. Esta exposición percorre as vicisitudes e estratexias das principais asociacións culturais galegas dos últimos tempos da ditadura franquista.