Panorama de Cooperativas no Culturgal

Desde veteranas como Culturactiva ata as que teñen só uns meses como Cestola na Cachola. Malia aos puntos en común, as cooperativas que este ano desembarcan no Culturgal teñen características particulares. Repasamos o seu traballo.

Culturactiva
Máis de dez anos de actividade avalan o traballo deste grupo, que se presesnta como "distribuidora líder en Galicia de teatro cómico e de rúa". Co Festiclown como bandeira, a empresa centra o seu traballo no mundo do clown e das artes escénicas, atendendo tamén a iniciativas cun carácter social e sustentable como é a feira Terractiva. Pola banda solidaria, é coñecido o seu traballo no festival Pallasos en Rebeldía e outras iniciativas similares.
Web de Culturactiva

Melandrainas Creativa
As artes escénicas e a animación orientada aos máis novos é o eixe da actividade desta cooperativa, que leva xa uns anos a traballar. Para alén de montar espectáculos, e da preocupación por recuperar o café-teatro, tamén abordan tarefas de formación.
Facebook de Malandrainas

Urdime Xestión
Propostas culturais centradas na infancia e na xuventude, artes escénicas, comunicación e xestión administrativa para entidades culturais son algunhas das propostas da empresa. No seu catálogo atopamos tamén a representación de compañías como Fantoches Baj, Teatro Antroido, Os tres tenedores ou a Magín Blanco.
Urdime

Teixugo
Interpretación e xestión ambiental ou interpretación de patrimonio son algúns dos ámbitos que se abordan deste Teixugo. A cooperativa xorde do encontro de profesionais de ámbitos como a Bioloxía, a Educación Ambiental, o Maxisterio, a Pedagoxía e o Conservacionismo.
Teixugo

O Cable Inglés
Nada en 2012, esta cooperativa achega desde a xestión de proxectos culturais a deseño web, pasando por servizos de comunicación. Entre os seus proxectos está a coordinación dos Premios Galegos da Música ou o ciclo de concertos que desenvolven coas adegas Martín Codax.
O Cable Inglés

Ardora
Esta cooperativa centra a súa actividade na creación de contidos educativos para o web e no desenvolvemento da aplicación informática do mesmo nome, que permite desenvolver múltiples actividades interactivas para os máis novos.
Ardora

Trespés
En Redondela desde 2011, esta cooperativa oferta servizos que van desde a formación e a produción de contidos ata traballos de investigación e consultoría. Entre as propostas máis coñecidas está o seu traballo no proxecto Mar, traballo e patrimonio para a posta en valor da enseada de San Simón ou o proxecto Oucas para a posta en valor das algas como recurso en Baiona. Tamén son os responsables de desenvolver o documental En todas as mans sobre o monte en mancomún.
Trespés

Sonaxe
A cooperativa naceu en 2008 da man de varios profesores da escola de música de Boiro. Ante a desaparición da empresa que xestionaba este centro, acordaron constituírse como cooperativa para continuar o seu traballo. Para alén de continuar con este labor, ampliaron a súa acción á edición de discos e a promoción musical.
Sonaxe

Cestola na Cachola
Nada este mesmo 2013, esta cooperativa pretende combinar a creación plástica co activismo social. Murais, obradoiros de serigrafía ou reutilización de roupa e a promoción de formas de consumo responsable fan parte desta iniciatia na que se reúne o traballo de especialistas en economía e de creadoras artísticas.
Cestola na Cachola

Imperdibles
Representación de grupos, organización de eventos relacionados coa música ou obradoiros de formación centran o traballo desta cooperativa nada en 2010. Na súa carteira, proxectos como os de Sérgio Tannus, Xoán Curiel ou Ophiusa.
Imperdibles