Comezou cunha convocatoria nas redes sociais, seguiu cunha exposición de fotografías de Isabel Leas e continuou con varios recitais nos que artistas galegos e de diferentes países da lusofonía compartían escenario. Agora, CoraSons, o proxecto que coordina Uxía Senlle ve a luz na forma dun libro-CD-DVD no que participan 29 músicos e creadores e que achega ademais as fotografías do proxecto e un documental que amosa o proceso de xestación do mesmo.
Kalandraka publica este volume que recolle 19 temas a cargo de, entre outros, João Afonso, Sérgio Tannus, Najla Shami, Xoán Curiel, Aline Frazão ou António Zambujo. O volume presentarase o vindeiro sábado 30 de novembro ás 13 horas no Espazo Libro do Culturgal e protagonizará un concerto no Espazo Carpa ás 20 horas.
