A ciencia do día a día

GCiencia é un novo proxecto xornalístico que nace hoxe en Galicia. O obxectivo é analizar proxectos científicos nos que estean involucradas institucións públicas, universidades ou empresas privadas, e narrar a actualidade da ciencia en galego. Un novo proxecto xornalístico en rede que está a revelar o bo momento da divulgación científica en galego.


Un equipo de xornalistas coordinado por Eduardo Rolland e Pablo López acaban de lanzar GCiencia (www.gciencia.com), un proxecto periodístico en Internet destinado a dar a coñecer a ciencia galega e que se manexará con tres idiomas (galego, castelán e inglés). O seu núcleo serán as reportaxes, informacións e entrevistas, incorporará material audiovisual e manterá tribunas de opinión, blogs e videoblogs.

Para os promotores, “GCiencia parte da formulación de que o xornalismo debe realizar un esforzo para axudar a transmitir á sociedade a investigación que se fai en Galicia, polo xeral dunha alta calidade. O desenvolvemento do proxecto editorial levouse a cabo grazasa a seren un dos proxectos premiados no programa de bolsas iProx do Colexio de Xornalistas de Galicia e Novacaixagalicia.

GCiencia está estruturado en grandes áreas: Ciencia, Industria, Mar, Universidade e a partir de aí unha división por formatos (Vídeo, Opinión, etc.) ademáis dunha área de Historias GC., que recollen perfís biográficos de científicos galegos do pasado e unha selección de artigos en inglés.

Os responsables
Pablo López está estreitamente vinculado dende hai anos ó xornal El País, iniciou a súa carreira profesional en Faro de Vigo e colabora habitualmente en medios. Eduardo Rolland combina os seus artigos para La Voz de Galicia co seu traballo como xestor cultural, escritor -con varios libros publicados- e como director e guionista de televisión e documentais. A coordinación dixital correrá a cargo do tamén xornalista Alberto Quian, investigador en medios de comunicación e autor de El impacto mediático y político de WikiLeaks (editorial UOC).