Vidal Bolaño volta aos escenarios co Touporroutou da lúa e do sol

O vindeiro venres día catro chega aos escenarios do Salón Teatro Touporrotou da lúa e do sol, de Roberto Vidal Bolaño. Eduardo Alonso dirixe unha montaxe para a que uniron esforzos "non só na parte financeira, senón tamén na artística", o Centro Dramático Galego e mais a compañía Teatro do Noroeste. Na produción colaborou tamén a Escola Superior de Arte Dramática, que correu tamén coa guía didáctica da montaxe e de onde proveñen todos os actores.

A obra, que conta as peripecias dunha compañía ambulante de cómicos, repasa as lendas galegas da man de catro actores que interpretan un total de 22 personaxes e que ademais cantan, bailan e manexan títeres en escena. Segundo destacou Alonso, "esta é a única obra que Vidal Bolaño abordou dúas veces, unha con títeres e outra con actores, polo que está claro que lle tiña un especial aprezo. Do mesmo xeito, Manuel Guede, director do CDG, apuntou que, malia a se considerar axeitada para os máis novos, a produción "ten múltiples lecturas e pode ser desfrutada por todas a idades. O propio Roberto non falaba de teatro infantil senón de teatro familiar".

Guede sinalou asimesmo que a produción desta obra insírese no proxecto de repasar a traxectoria de Vidal Bolaño, homenaxeado estes ano co Día das Letras, para o que a entidade que dirixe colaborou coas compañías Teatro do Antroido, Teatro de Aquí e agora con Alonso, que fundou co homenaxeado Estarivel Teatro.

A obra estará en cartel ata o día 20 de outubro cunha intensa programación para escolares que suporá 16 funcións, e outras seis pensadas para público xeral. A seguir, iniciará unha xira por portugal e prevé continuar en cartel en diferentes localidades do país ao longo do vindeiro ano. Segundo destacou na presentación da obra Manuel Guede, director do CDG, o formato de coprodución "permitirá que a obra continúa a súa xira para alén deste trimestre, algo se fose producida só polo CDG non sería posible".