Convócanse os Premios Galegos da Música con 13 categorías

Desde hoxe e ata o vindeiro 21 de outubro está aberto o prazo para se presentar á primeira edición dos Premios Galegos da Música Martín Códax. A convocatoria da Asociación de Músicos ao Vivo está dirixida a solistas e a conxuntos compostos como mínimo nun 50% por galegos e que desenvolvan a súa actividade no noso país, que poderán optar a algunha das 13 categorías dos galardóns. As bases indican que non cómpre ter editado disco para se presentar, xa que se pretende valorar o feito musical ao vivo, e serán os socios do colectivo convocante (280 na actualidade) os que escollan os gañadores mediante os seus votos.

Segundo Xacobe Martínez Antelo, voceiro de Músicos ao Vivo, a intención dos premios "é que todos os músicos galegos atopen o seu oco, desde as charangas que non editaron ningún disco ata os Djs que poñen os seus temas en Internet, desde grupos de cámara que estudan nos conservatorios aos de jazz".

Para o vindeiro 15 de novembro daranse a coñecer os tres finalistas de cada categoría, mentres que a entrega dos premios farase o venres 13 de decembro, logo dunha segunda rolda de votacións. O premio consiste nunha figura deseñada polo artista e músico vigués Víctor Lorenzo. A convocatoria conta co apoio das Adegas Martín Códax, da Axencia Galega das Industrias Culturais e mais do Concello de Pontevedra.