Coñecer a vida e a creación dos pobos indíxenas que viven na selva de Venezuela. Esta é a proposta que fai a exposición Orinoco. Viaxe a un mundo perdido, que se inauguraba onte no Museo Centro Gaiás da Cidade da Cultura de Galicia. A grande aposta do complexo para o que resta do ano consiste unha selección de 1.135 pezas de 12 etnias da zona, entre obxectos artísticos e ferramentas cotiás.
Ademais poden verse 120 fotografías de Edgardo González Niño e Charles Brewer-Carías, uns fondos que fan parte da colección Colección Patricia Phelps de Cisneros, considerada a máis importante de arte étnica de Latinoamérica.
A exposición, que se poderá ver ata xaneiro de 2014, inclúe un apartado centrado na infancia, o Campamento Tepuy, que lles permitirá achegarse aos sabores, ferramentas e xeito de vida dos pobos que se retratan na mostra. Como complemento do material do Orinoco, a exposición inclúe tamén un apartado dedicado á cultura fluvial do noso país, amosando embarcacións, artes de pesca ou construcións vencelladas aos ríos.
