Multiplícanse os encontros de pensamento sobre a crise

Multiplícanse na axenda as citas para reflexionar sobre a situación actual. Por unha banda, en Vigo comezan mañá as XXI Xornadas de Filosofía que organiza o colectivo Aletheia. Co lema ¿Estamos ante unha nova etapa histórica? o encontro abordará ata o vindeiro 10 de maio perspectivas como a de Javier Muguerza, Ubaldo Martínez Veiga, Jesús Mosterín, Félix Ovejero Lucas ou Francesc de Carreras. De xeito paralelo, en Lugo comezaba esta mañá o IX Curso de Primavera da Universidade de Santiago, que se desenvolve baixo o lema A crise de Occidente, unha visión multidisciplinar. Con Ignacio Ramonet a iniciar as intervencións e Federico Mayor Zaragoza como encargado do feche, o encontro contará coa presenza de 15 profesores da USC.

Para setembro, esta mesma institución convoca para setembro, e no marco dos seus cursos de verán, o encontro Cartografías das resistencias: Transformacións da clase política ou as revoltas globais. As redes de comunicación e os contradiscursos, a desobediencia civil, a lingua e o poder ou as drogas son algunhas das cuestións que se abordarán.