Volven as (mesmas) criaturas

Foi en Narón hai uns trece anos cando Teatro de Aquí estreou a súa montaxe Criaturas. O seu director, Roberto Vidal Bolaño, non podería imaxinar todo o que lle suporía esa obra. Unha xira galega e outra estatal, éxito de crítica e público e varios premios: o do Eixo Atlántico (1999), un María Casares (ano 2000) e un Max a mellor autor teatral galego (2001). Agora, cando se lle dedica a Vidal Bolaño o Día das Letras Galegas, Teatro do Aquí regresa a Narón para volver presentar o mesmo texto pero cos cambios estritamente necesarios.

Hai un interese especial en que as Criaturas de Roberto Vidal Bolaño lozan co mesmo ritmo, espírito e estética que hai catorce anos. “A nosa intención é recuperar o que se transmitiu” aseguraba Evaristo Calvo, que será o director desta aposta de Teatro do Aquí, que chega logo dunha tupida rede de colaboracións institucionais (a Secretaría Xeral de Cultura e o Centro Dramático Galego) e privadas (a Fundación Autor da Sociedade Xeral de Autores). Paco de Pin, da compañía de loxística Cachét explicou que “aínda que sexa con novas tecnoloxías, imos recrear aquela atmosfera e aquela ilusión dun autor que nos ensinou que esa era unha forma de vivir”. Nesa busca de trasladar o máis fielmente posible a montaxe que Roberto deseñou, que Teatro do Aquí mantivo o mesmo equipo (Belén Constenla, Xoan Carlos Mejuto e o equipo artístico). So faltan Rubén Ruibal, que será substituído por Marcos Orsi, e Miguel Varela por Vicente de Souza. Ambos os dous "por cuestións de axenda" explicaba Belén Quintas.

Criaturas é unha viaxe feita desde o humor, a ironía e o sarcasmo para contar a historia de personaxes anónimos, cotiás que se contraponen co Doutor Frankestein nunha galería figuras que lle permiten ao autor falar do ser humano.

Esta produción está enmarcada nos actos de celebración do Día das Letras Galegas, dedicados este ano ao autor dramático e que se complementa coa produción propia do CDG, Días sen Gloria (estrea o 5 de abril) e as coproducións Touporroutou da lúa e do sol (Teatro do Noroeste) e Bailadelas(Teatro do Entroido, 12 de maio na Coruña).