Berrobambán e Bichakadela danlle unha nova vida ao refugallo

Detalle do espectáculo. Fonte: Berrobambán

Isolda co seu libro de viaxes, Hipatia cun telescopio, Borobonte e a súa tartaruga, e Lustucrú cunha pata de pau. Todos eles son amigos e viven con esas cousas que o resto de mundo tira. Este é o ambiente que Paula Carballeira creou para O refugallo, texto co que gañou o premio Manuel María de Literatura dramática infantil e que agora Berrobambán e Bichakadela fan realidade (Salón Teatro de Santiago, de xoves 17 a martes 22).

O refugallo fala do que se prescinde e se tira e que se reconstrúe a través da capacidade que teñen os nenos de imaxinar e de darlle novas vidas explicaba a súa autora, Paula Carballeira, no momento no que recibiu o premio. Un ano despois, Berrobambán e Bichakadela unen as súas dinámicas de traballo para poñer sobre as táboas este texto de mensaxe ecolóxica e varios niveis de lectura pensado para grandes e pequenos.

A obra conta con catro actores en escena formada por Paula Carballeira, Nuria Sanz, o contador de historias José Campanari, e o bailarín David Loira. Catro perfís creativos ben diferentes aos que Nacho Sanz poñerá música en directo con elementos de refugallo. Chiqui Pereira é director desta obra na que buscou sempre unha máxima fidelidade ao texto.

Na rolda de prensa de presentación do proxecto, os responsables da proposta reivindicaron a importancia da publicación dos textos dramáticos, así como a necesidade de abrir os circuítos de exhibición no que se poidan ver os espectáculos que se apoian.