As letras de Anxos Sumai iluminan imaxes para a lembranza e imaxes que esvaran na néboa dos soños de onde saíron. Pequenos anacos de realidade mergullados en sopa quente de mamá; illas de inverno navegando polas correntes do aninovo e o Nadal. En "Anxos de garda" atopamos estampas tras do cristal que semellan sacadas de haikus xaponeses, cheas de sensibilidade e doce vaguidade. E como regalo de reis engadimos ó habitual encrucillado outro máis, xuntando así dobre ración de preguntas para as mentes que quedan espertas nas noites de Reis.