Unha procesión pagá lembrará a Vidal Bolaño

Co lema Procesión da Santa Bolaña. De tazas con Roberto Vidal Bolaño varios colectivos sociais de Compostela organizan para o vindeiro sábado dia 15 de Decembro un percurso pola cidade en homenaxe ao dramaturgo. Segundo adianta a descrición da actividade, o grupo "Facendo fe de puro paganismo recorrerá as rúas de Compostela entre cánticos e ladaíñas profanas facendo parada e via crucis en distintos bares da zona vella, onde o público asistente vai recrear, entre viño e viño, varios fragmentos da obra de Roberto".

O proxecto conta coa participación de Víctor Mosqueira, Clara Gayo, Chiqui Pereira, Xesús Ron e Carlos Santiago e rematará no Pub Avante cunha foliada e un concerto de concerto de Leo Arremecaghoná e García DKTC. No mesmo día, pola mañá, haberá unha charla sobre o dramaturgo na libraría Couceiro, a cargo de Paco Macías, de Edicións Positivas. A saída do percurso será ás seis da tarde no local da Asociación Veciñal As Brañas de Andrés, nos Pelamios.