O Furancho de Arte Contemporánea abre a segunda temporada con fotografía

Tea Artists é a exposición fotográfica coa que o Furancho de Arte da Peregrina inicia a segunda temporada de actividade artística. Nesta ocasión, o comisariado de Violeta Janeiro Alfageme, coa colaboración do fotógrafo Xepo W.S. (Dénia 1980), adéntrase nos estudos de artistas chineses para dar a coñecer como son as condicións de produicón nunha megalópole como é Shanghai. Canda a exposición, os vindeiros vernes (19 e 26) proxectaranse dous filmes Bumming in Beijing de Wu Wenguang e Frozen de Wang Xiaoshuai (1997) que servirán para contextualizar esta exposición fotográfica que procura desmontar falsos mitos sobre o sistema da arte chinés, que se move entre a prohibición local e o recoñecemento internacional.

Fotografías e entrevistas a doce artistas de diferente idade, lugar e éxito serven para radiografar a realidade da actualidade cultural chinesa. Esta exposición pretende achegarse a como son as condicións de traballo dos creadores contemporáneos deste país, moi condicionado polo seu sistema político e a súa recente (e aparente) ao exterior. Pluralidade de estilos por parte de creadores de formación autodidacta evidéncianse nesta exposición.

O FAC
Olmo Blanco, Ania González e Diego Vites promoven desde este 2012 un espazo artístico que está afastado dos circuítos comerciais e institucionais da arte. Montaxes de produción propia, trabalos feitos por encarga a artistas e colectivos, exposicións de curta duración e un laboratorio de experimental de improvisación musical (Laboratorio de son FAC) conforman o esquelete de traballo deste proxecto que se sitúa na contorna rural como unha forma de crítica e descontento do actual desenvolvemento do sector profesional das artes en Galicia