Cuestión de método

Quince anos, varias adaptacións teatrais previas e un premiado filme non impiden que a historia que conta O Método Gronholm perda un ápice do seu sentido. Todo o contrario, “ten unha vixencia tremebunda coa situación laboral e social na que está o país” explica Xulio Lago, director desta montaxe que coproducen o Festival Internacional de Outono de Carballo e a compañía Talía Teatro co apoio da Agadic. A función, que se estrea hoxe en Carballo, representa un proceso de selección de persoal con catro candidatos.

Tres homes, unha muller e un único posto de traballo. ¿Quen o conseguirá? Este é o punto de saída dunha obra que, segundo Xulio Lago, “é unha comedia, un xogo dramático perverso que xoga coas emocións, cos sentimentos… co que faga falta en prol dos resultados”. Na opinión de Xulio Lago, que presenta unha montaxe realista, o “espectáculo xoga cun elemento fundamental coa mentira, a manipulación, a utilización dos datos dunha maneira interesada para conseguir uns resultados que é o acontece cada día en diferentes contextos” . Artur Trillo, membro da compañía e actor nesta montaxe, incide no carácter agridoce do espectáculo “porque conta situación duras, nun contexto moi marcado como o presente e coa pelexa polo posto laboral”.

Talía Teatro enfróntase por terceira vez a un texto de Jordi Galcerán (antes o fixo con Dakota en 2001, con Palabras encadeadas en 2009) e será o epectáculo que teña en cartel para o seu 25 aniversario que se cumpre en 2013.

Con esta montaxe xa van dúas, as coproducións que asume o Festival Internacional de Teatro de Carballo, tras unha primeira incursión con “Un cranio furado” de PT Excéntricas, que gozou de bastante recoñecemento de público e crítica e recibiu cinco premios María Casares.


Ficha artística:
Toño Casais
Artur Trillo
María Ordóñez
Dani Trillo

Equipo técnico
Vestiario: Martina Cambeiro
Maquillaxe; Martina Cambeiro
Fotografía: Rubén Prieto
Axudante de dirección: Diego Rey
Dirección: Xúlio Lago


Duración: 90 min.