Pecha La Boletería, o web de venda de entradas

Naceu no ano 2008 co obxectivo de converterse nun portal especializado que dera acubillo a todas as actividades culturais que se desenvolvesen en Galicia, tanto en de pagamento como gratuítas. Pero non puido ser, este mes de agosto pecharon o proxecto porque “era inviable economicamente”, explica Mariana Saviao, a súa promotora.Un dos últimos espectáculos para os que vendeu entrada foi para o Resurection Fest celebrado o pasado mes de xullo en Viveiro.

Despois de catro anos de traballo, varias remodelacións e un profundo proceso de transformación tecnolóxica (posibilitar a compra de entradas con dispositivos móbiles) decidiron desistir. “Puxemos cartos dos nosos propios petos e, malia que foi doloroso, decidimos non continuar” explica a directora dun proxecto que chegou a contar con cinco persoas pero que “nos últimos tempos notamos un descenso drástico de actividades tanto de ámbito público como privado" que acabou por asfixiar a iniciativa.