A Xunta aproveita a nova fama do Códice Calixtino como reclamo turístico cunha exposición

A expectación motivada polo “mediático” roubo do Códice Calixtino revélase agora como fundamento positivo para a preparación dunha exposición itinerante sobre esta xoia bibliográfica. A Sociedade Anónima de Xestión do Plan Xacobeo, está a preparar esta exposición que percorrerá dende o próximo mes de setembro e durante 2013 diferentes cidades españolas e estranxeiras. Entre as españolas figurarán, polo de agora, Madrid, León e Málaga o resto dos destinos nacionais e internacionais aínda están en fase de negociación. Tratarase dunha mostra didáctica sobre a historia e contidos do Calixtino, o ambiente cultural no que naceu, a mentalidade da época, a catedral e a cidade de Santiago no século XII e unha síntese da historia do Camiño de Santiago e dos seus valores culturais.

Entre as pezas a expoñer haberá facsímiles como o do propio Códice ou o da cruz doada polo rei Afonso III no 874 e que foi realizado, como a orixinal, en ouro e pedrería no ano 2004. Tamén se expoñerán orixinais como o capitel medieval dunha casa compostelá, un libro do século XVI que recolle gravados con escenas de peregrinación ou un rosario de acibeche e prata do gremio de acibecheiros de Santiago do século XIX. Entre os elementos que complementan a mostra figurarán fotografías ampliadas das miniaturas do Códice, vídeos de peregrinos actuais e as reconstrucións virtuais do altar maior e da fachada norte da primitiva catedral románica segundo as descricións do Libro V do Códice Calixtino. En canto as pezas contemporáneas relacionadas estarán as láminas e letras capitais de Francisco Leiro realizadas no 2009 para a tradución galega, un óleo do Apóstolo de 1992 de Afonso Sucasas e a serie de pinturas sobre os milagres de Santiago feitas por Antón Patiño no ano 1993. A música ambiental da exposición procederá das notacións musicais orixinais do Códice.