Toño Casais preside a Asociación de Actores buscando potenciar a plataforma da artes escénicas

A asamblea da Asociación de Actores e Actrices de Galicia votou este domingo a Toño Casais como o seu novo presidente. Era unha candidatura proposta polo seu antecesor, Antonio Durán “Morris”, polo que a nova xunta directiva mantén nomes da anterior, xunto con novas caras do sector escénico. Toño Casais asegura que entre as liñas claves do seu mandato destaca “permanecer na plataforma das arte escénicas como unha ferramenta de loita diante das institucións”, continuar defendendo os intereses do sector a través da súa participación no Consello Reitor de Agadic diante dunha situación que cualificou como “dramática para o sector”. Ademais, a implicación activa na celebración do Día das Letras Galegas a Roberto Vidal Bolaño, así como presiona pola celebración da feira das artes escénicas.

“Un dos pilares nos que imos poñer máis forza, é na implicación da celebración do Día da Letras Galegas dedicada a Roberto Vidal Bolaño que para nós é como se lle dedican o día ao teatro, porque el sintetiza a historia do teatro profesional en Galicia”. Para iso, alén de ofrecer a súa colaboración ao Centro Dramático Galego, a Asociación ten a intención de facer unha exposición para dar a coñecer tanto a figura de Roberto Vidal Bolaño como a profesionalización do teatro e levar ese traballo por toda Galicia. A curto prazo, están fixadas unha serie de xuntanzas, entre elas no Consello Reitor do CDG para esta semana, así como presionar pola celebración da Feira Galega das Artes Escénicas. “A día de hoxe Agadic non ten a intención de celebrar a feira, unha decisión moi negativa para o sector e nós pretendemos buscar alternativas para que este mecanismo importante para a distribución dos espectáculos non desapareza”.

Entre outra das liñas de traballo do novo presidente, está a intención de “permanecer na plataforma das artes escénicas (que conforman Escena Galega, a Asociación de Actores e Actrices, a Asociación de Titiriteiros, a de Magos) como unha ferramenta de loita diante das institución é que pretendemos que consolidar”. Desde o seu punto de vista, a situación escénica atravesa un difícil momento ante o peche dalgunhas compañías, e a renuncia doutras a montar ningún espectáculo esta temporada.

Nova Xunta Directiva
A composición da nova Xunta Directiva está formada polos seguintes membros: Toño Casais (Presidencia), Casilda Alfaro (Vicepresidencia), Guillermo Carbajo (Secretaría), Camila Bossa, Álex Carro, Antonio Durán “Morris”, Victoria Pérez, Lucía Regueiro, Mónica García, Vicente De Souza, Josito Porto e Déborah Vukusic como vogais.