Menos postos e máis sinaturas no Saló del Còmic de Barcelona

Por segundo ano consecutivo, Galicia non conta cun posto propio no Saló del Còmic de Barcelona. No entanto, unha presenza crecente de autores con publicacións propias refrendan a boa saúde do panorama creativo neste campo no marco da trixésima edición desta cita, considerada a máis importante da novena arte estatal. Deste xeito, Miguelanxo Prado, Jacobo Fernández, Víctor Rivas, Lola Lorente, Martín Romero e mais David Rubín e José Domingo (candidatos aos premios do Saló) asinarán exemplares das súas últimas obras en diferentes postos do evento.

Fronte a esta pegada dos nosos autores, detéctase unha diminución na presenza de editoras e publicacións do noso país. Deste xeito, unicamente El Patito Editorial contará cun posto, que comparte coa libraría Cómic Hunter, ao igual que o pasado ano. Canda a eles, destaca a presenza, por ver primeira da revista El Arca de las Historietas que comparte posto con dúas iniciativas foráneas. Caen deste xeito habituais como BD Banda, Retranca ou o colectivo Polaqia, xa disolto, que non amosarán os seus traballos nesta cita. No espazo de fanzines atopamos, como é habitual, a Mariano Casas, que presentará a súa obra La historia jamás contada jamás contada. Tamén asistirá ao evento Juan Carlos Sanmiguel, da libraría Alita que moverá a obra In memoriam, de Kike Benlloch e Fonso.

Canda a isto, os autores galegos están presentes tamén nas exposicións colectivas dedicadas a Robots (Kiko da Silva), ou de homenaxe a Moebius (Miguel Porto, Santy Gutiérrez, José Domingo e Kike Benlloch). Porto tamén visitará a Cidade Condal para actuar como picadiscos na presentación da editora Entrecómics Cómics.