Antonio Casares Rodríguez protagoniza o Día do Científico Galego

A V Edición do Día do Científico Galego, que promove a Real Academia Galega de Ciencias (RAGC) ten a Antonio Casares Rodríguez como protagonista. Nado en 1812, este químico, farmacéutico e médico, posuidor tamén de amplos coñecementos no campo da Xeoloxía, foi no seu tempo un pioneiro en diferentes campos. Deste xeito, acendeu a primeira luz por arco voltaico de España en Compostela, iniciou a síntese de éter e introdociu os métodos da espectroscopia a nivel estatal. Con ocasión da efeméride, a RAGC celebra na súa sede en Compostela un acto de homenaxe a partir das sete desta tarde.

Canda a isto, a Fundación Barrié, a través do seu proxecto Educabarrié, está a programar unha serie de obradoiros diácticos encol do homenxeado e distribúe en diferentes centros do país unha guía didáctica sobre Casares. Dentro das celebracións, Monforte, vila natal do investigador, acollerá o vindeiro sábado un espectáculo de ciencia na rúa.