Fuck Cómics prepara o seu quinto e último número

Está na imprenta o que será quinto e último número do fanzine vigués Fuck Cómics, que chegará proximamente ás tendas. O proxecto, que nacera hai sete anos, chega ao seu fin cun volume que terá dúas capas diferentes. Alex Cal asina o debuxo que ilustrará 400 exemplares da tiraxe, mentres Davida é autor da ilustración para outros cen. Kalosú é o responsable da contracapa nos dous casos. Segundo explican no seu blog, o incremento de proxectos profesionais dos promotores do fanzine deu en que nos últimos dous anos a cabeceira ficase con pouca actividade. Ante esta situación, os autores consideran que o mellor é dar por finalizada a iniciativa. Para alén dos creadores xa mentados, o número conta con colaboradores como Norberto Fernández, Uxío, Xermánico, Javi Camino, Carlos Trigo, David Buceta ou Cristina Pérez-Salgado.