Patrimonio cataloga un novo castro de seis hectáreas na Mariña luguesa

A Asociación Mariña Patrimonio avisou á Dirección Xeral de Patrimonio da existencia dun gran sitio arqueolóxico sen catalogar no litoral lugués, e Patrimonio acaba de confirmar a existencia do sitio arqueolóxico, que foi inscrito nos rexistros da Xunta como Xacemento O Carreiro-Marzán con clave GA27019021. Aínda que Patrimonio non indica a adscrición cronolóxica do sitio arqueolóxico, segundo Mariña Patrimonio trátase dun castro a xulgar polos numerosos materiais (muíños, restos de vivendas, cerámica) que se atopan nos derrubos. A relevancia do achado está en que é un dos castros máis grandes da Mariña luguesa, ocupando aproximadamente unhas 6 hectáreas de terreo (os castros teñen de media 1 ou 1,5 hectáreas) e catro penínsulas costeiras. Boa parte do sistema defensivo e do interior do castro foi destruído nos últimos anos por obras públicas e particulares pero Mariña Patrimonio afirma que "O Carreiro mantén moitas hectáreas, presumiblemente intactas, que deben ser protexidas".