A viúva de Díaz Pardo co presidente da Xunta e outros representantes das Administracións. Foto: Xunta
A Biblioteca da Cidade da Cultura encheuse onte da sociedade política e cultura galega na homenaxe que se lle rendiu a Isaac Díaz Pardo, organizada pola Xunta. Os oradores salientaron as facetas creativas, empresariais e o compromiso de Díaz Pardo con Galicia. Coa música de Susana Seivane, diferentes membros do mundo da cultura vinculados ao galeguista fixeron unha valoración da súa vida e obra.
O arquitecto Fernández Albalat destacou que se tratou dun dos "mellores pintores figurativos do século XX" en Galicia e o Presidente do Consello da Cultura Galega, Ramón Villares, salientou como "a memoria marcou toda a súa vida" porque, segundo Villares, Díaz Pardo, "tivo unha idea fixa: construír un futuro para galicia con memoria e sen divisións sectarias". O Presidente da Xunta de Galicia, Alberto Núñez Feijóo, sinalou que xente como Díaz Pardo, "logrou que nos vexamos como un pobo capaz, creativo, apto para empresas colectivas".
