Política Lingüística convoca as axudas para normalización no ámbito local

Tal e como adiantar Anxo Lorenzo no Parlamento, o Diario Oficial de Galicia acaba de publicar a convocatoria de axudas da Secretaría Xeral de Política Lingüística para a dinamización do galego no ámbito local. Como estaba previsto, a partida para este fin é de 520.000 euros, que servirán para cubrir actividades desde o 1 de xaneiro de 2011 ao 15 de outubro de 2012, o que supón unha importante diminución neta dos fondos anuais con este fin a respecto de anteriores convocatorias.

As axudas que agora convoca Política Lingüística presentan catro liñas. As dúas primeiras están destinadas á crear un servizo lingüístico a través da contratación de persoal técnico por parte de concellos ou agrupamentos dos mesmos. A terceira pretende favorecer a continuidade de servizos deste tipo xa existentes, mentres a cuarta apoia a realización de actividades a prol da lingua mesmo sen contar con este tipo de equipos. Na concesión de axudas, sempre destinadas a entidades locais de máis de 3.000 habitantes, priorízanse aqueles concellos que están integrados na Rede de Dinamización Lingüística, os que se agrupen para realizar actividades e mais os que xa teñen en marcha servizos.

A última convocatoria con este fin, feita en 2011, contaba con 397.710 euros e fora suspendida o pasado outono pola falta de crédito. Do mesmo xeito, no anuncio do DOG de hoxe condiciónase a execución das axudas á existencia de crédito adecuado nos orzamentos, e prevese a posibilidade de que se modifique a contía anunciada.

A pasada semana, a Coordinadora de Traballadores de Normalización da Lingua (CTNL) denunciaba que os problemas orzamentarios neste apartado provocaron o feche de 15 servizos de normalización locais ao longo de 2011. Segundo os datos do Centro de Documentación Sociolingüística de Galicia do Consello da Cultura, na actualidade están en activo 53 servizos nos concellos do noso país.