Acollerá unha exposición sobre a Compostela de 1211

Esta semana abre ao público un dos edificios máis emblemáticos da praza de Praterías en Santiago de Compostela. Trátase da Casa do Cabido, un exemplo do barroco, construída por Clemente Fernández Sarela, aparellador de Fernando de Casas, para adornar a praza próxima á catedral. Despois de que o Consorcio de Santiago adquirira o inmoble en 2008, este ano execturáronse as obras de restauración tanto da fachada, como do edificio contiguo. En total destináronse preto de 800.000 euros financiados na súa maior parte, con cargo ao 1% cultural do Ministerio de Fomento.

Estes traballos enmárcanse, apunta unha nota de prensa do Consorcio de Santiago, no proxecto global de actuación cultural que o Consorcio está a levar a cabo na praza das Praterías, xunto coa remodelación do edificio do antigo Banco de España para a súa adecuación como sede principal do Museo das Peregrinacións e de Santiago.

Uso público
Esta reforma permite incorporar á oferta cultural da cidade de Santiago 627 metros (repartidos entre o baixo cuberta, pranta baixa e dous andares), que pretendeu recuperar a maior parte de vigas e pezas de madeira orixinais, así como a adaptación do edificio a persoas con mobilidade. O edificio abrirá ao público cunha exposición que recreará a Compostela de 1211, ao encadrarse nos actos programado para celebrar o oitavo centenario da consagración da Catedral.

Este edificio forma parte da paisaxe santiaguesa, serviu de inspiración a Valle-Inclán no conto A miña irmá Antonia e, na súa contorna rodouse o filme de Antón Reixa, O lapis do carpinteiro.