Cultura con banda magnética

Propostas para un, dous ou tres días, que inclúen descontos que valen tanto para perruquerías, aloxamentos en hoteis como entradas para concertos, museos ou espectáculos máis, nalgún caso, acceso ilimitado ao transporte urbano. Son as tarxetas turísticas que funcionan con ritmo desigual nas principais ciudades de Galicia.

As tarxetas turísticas son iniciativas habituais de promoción das cidades que teñen como obxectivo facilitar a estadía nunha cidade con ofertas que van desde o transporte, aloxamento e con propostas interesantes. As diferentes modalidades dependen da realidade turístico-cultural do territorio sobre o que actúan e do tipo de turismo que se pretende fomentar. A maior parte delas véndense tanto nos establecementos que se incorporan á promoción, como nos circuítos de venda. E a aceptación turística depende tanto da cantidade como calidade das promocións, así como da información e accesibilidade que o turista teña desta proposta.
O concello da Coruña acaba de anunciar que ten sobre a mesa a implantación dunha tarxeta turística. A xerente da empresa municipal de turismo, Fernanda Arenas, explica que “de momento estamos a valorar a proposta pero non temos nin definido o modelo nin cando se implantará”. O que sí teñen, é unha experiencia previa, a Coruña Card Millennium que puxeron a venda hai uns catro anos ofrecía acceso gratuíto ao tranvía turístico, así como as entradas aos museos científicos coruñeses (Aquarium Finisterrae, Domus/Proxección Magnavisión, Casa das Ciencias/Planetario, Museo Arqueolóxico e Historico, Castelo de San Antón, Torer de Hércules), así como descontos en diferentes iniciativas de lecer (“Noroeste a Fondo”, no alugueiro de bicicletas ou Segway). Todo iso por 7 (tarxeta individual que inclúe un adulto máis un menor) ou 15 euros (dous adultos e dous menores). “A tarxeta tivo problemas de funcionamento e non era operativa polo que se deixou de empregar coa idea de estudar ben o produto” puntualiza Arenas. A penas leva dous meses entre o posto pero entre os seus obxectivos está a reactivación deste servizo. “Existen miles de tarxetas turísticas pero nós buscamos unha que se adapte á realidade da oferta coruñesa e que sexa útil para o visitante” aclara. Recoñece que na Coruña existe un “perfil alto de viaxante de negocios, pero tamén moito turista nacional; outro perfil de turista que chega desde Inglaterra e italiano, así como un incremento notorio de visitante de cruceiros”.

As últimas en chegar
Lugo e Pontevedra son as últimas ciudades que acaban de deseñar unha oferta turístico cultural pensada para o viaxeiro. Patricia López, técnica municipal de turismo de Lugo, explica que no ano 2008 “recibimos unha subvención do goberno centra para o desenvolver proxectos turísticos e, no marco daquela axuda, foi cando se puxo en marcha, entre outras propostas, a tarxeta turística”. Pero a iniciativa tardou en concretarse e non foi ata este verán que se puxo a venda a “Lugo Card”. “Ten a clara intención de motivar e aumentar a pernotación na cidade porque detectábamos que a maior parte dos viaxeiros que veñen a Lugo non quedan aquí a durmir, senón que veñen de paso, por iso a proposta inclúe desde ofertas nos hoteis, en establecementos comerciais, así como descontos para propostas culturais que organiza o concello como o Festival de Teatro Clásico ou o Festival de Jazz” explica López. A tarxeta ten tres modalidades (1, 2 ou 3 días) e conta con 51 establecementos asociados. En canto a proposta de tarxeta, desde o concello de Lugo explica que “hai infinidade de modelos de tarxetas, pero collemos referencias como Xixón, Valladolid ou mesmo Pontevedra e pretendemos adaptalo á nosa realidade”. Tendo en conta que o acceso á muralla e aos centros da rede museísticos son de balde, a súa proposta procuraba ofrecer un atractivo complementario a quen se achega ata a cidade. A tarxeta inclúe un plano e unha guía turística que ofrece información da cidade. O prezo entre 7 e 15 euros se é unha tarxeta individual e entre 14 e 30 euros se é familiar (2 adultos e 2 menores).

En marzo deste mesmo ano Pontevedra puxo a andar a súa tarxeta de visita. “Ten 60 establecementos que inclúe desde hoteis, restaurantes, un spa urbano, tendas de roupa que ofrecen descontos e, como a entrada do Museo de Pontevedra é de balde, fan descontos nos prezos das súas publicacións” explica Patricia Miralles, xerente da empresa pontevedresa de turismo. Recoñece que a idea non está funcionando moi ben, pero de cara a 2012 “estamos buscando darlle unha maior publicidade, así como a posibilidade de que a xente poida mercala a través da rede (ten sitio web propio) e poida beneficiarse do desconto desde o mesmo momento que fai a súa reserva hostaleira” aclara Miralles.

Desaparecidas
Vigo e Santiago son os outros concellos que tiveron nos últimos anos este tipo de tarxetas. Malia o seu bo prezo (entre 12 e 15 euros para 48 horas) ningunha das dúas iniciativas se manteñen a día de hoxe pola súa baixa demanda. Fontes de Incolsa, empresa municipal de turismo, explican que a tarxeta ofrecía transporte ilimitado ao transporte urbano e incluía descontos en 91 establecementos (desde locais nocturnos ata trens de proximidade, pasando por restaurantes, bares, cafetarías…) pero non tiña suficiente demandan e acabou por retirarse. Segundo fontes deste organismo, os baixos resultados conseguidos desta iniciativa que estivo operativa un par de anos, fan que non teñan intención de recuperala a curto prazo.

No caso de Ourense, no ano 2009 chegou a presentarse aos medios unha proposta de crear unha tarxeta turística de similares características (descontos en comercios, transporte, acceso a museos e termas) pero que non chegou, tal e como confirman desde a oficina municipal de turismo, a materializarse.