Publícase a delimitación oficial do Camiño Francés

A agardada delimitación oficial do Camiño Francés a Santiago, unha ferramenta fundamental para a protección deste patrimonio, é finalmente unha realidade. O Diario Oficial de Galicia publica hoxe os que recollen o percorrido da vía e mais a súa zona de amortiguamento ou de respecto desde a entrada no municipio de Pedrafita do Cebreiro ata o límite do termo municipal do Pino. Os traballos teñen unha excepción no tramo entre o lugar de Amenal e o límite do aeroporto de Lavacolla, no concello do Pino, onde está instalado un polémico polígono industrial por onde transcorre a vía.

Do mesmo xeito, tampouco se recolle a ruta no Concello de Santiago, para onde patrimonio anuncia un estudo específico en colaboración co goberno municipal "para analizar de xeito integral a incidencia neste termo municipal das diferentes rutas xacobeas". A partir deste planeamento, a Consellaría de Cultura anuncia que iniciará traballos de recuperación de tramos abandonados do roteiro e actualizará a sinalización do trazado oficial. Do mesmo xeito elaboraranse protocolos básicos de conservación.

A delimitación do Camiño Francés estaba xa prevista na Lei 3/1996 de protección dos Camiños de Santiago e é un instrumento fundamental para regular as actuacións de diversos tipos que se poden desenvolver na ruta e mais no seu contorno. A normativa afecta a construcións, cartelería e todo tipo de elementos que se queiran instalar na ruta e que, ata o de agora, ao non existir un percorrido oficial, en ocasión se atopaban nun baleiro legal.