Aitana Sánchez Gijón e Jorge Drexler reciben os premios da XXV edición de Cineuropa

Producións independentes, de calidade e premiadas nos principais festivais de cinema de referencia. Estes son os ingredientes do éxito de Cineuropa, unha cita imprescindible no calendario cultural do mes de novembro en Santiago que cumpre neste 2011, vinte e cinco anos de existencia. “Sen o respaldo do público non tería sentido” aseguraba o seu director e alma máter, Jose Luis Losa, que presentou a sección oficial, os ciclos temáticos e as galas de entrega dos premios. Aitana Sánchez Gijón recibe o premio Cineuropa na gala que abrirá esta edición do certame o vindeiro mércores 9. O outro premio recae en Jorge Drexler, que ofrecerá un concerto especial (martes 15) e que para o director Jose Luis Losa, “é un regalo que lle fai o concello ao seu público pola súa asistencia”. Ademais, “xuntando a celebración do 800 aniversario da Catedral e as vodas de prata de Cineuropa, a Real Filharmonía de Galicia interpretara música de Shostakovich” engadiu o concelleiro de Cultura, Ángel Currás. O prezo mantense en 3 euros a entrada individual e 20 euros o bono de 10 filmes.

Cineuropa exhibirá este ano filmes como "O cabalo de Turín" (de Bela Tarr, galardoado co Oso de Prata en Berlín), "Le Havre" (de Aki Kaurismaki, Premio da Crítica en Cannes), "Fausto" (de Aleksandr Sokurov, León de Ouro en Venecia), "Route Irish" de Kean Loach, "L’Apollonide" de Bertrand Bonello, ou acontrovertida "Hors Satan" de Bruno Dumontson. Ademais diso manterá dous ciclos dedicados ao cinema alemán: un específico do realizador Anders Veiel e outro para acoller á chamada “Escola de Berlín” , unha xeración de realizadores novos que está a desenvolver “un traballo interesante e creativo” puntualizou Losa. Haberá tamén espazo para o cinema galego, nunha sección coordinada por Martin Pawley que, segundo o director de Cineuropa “terá nome como Marcos Nine, Angel Santos, Lois Patiño e o traballo de Alberte Pagán e Xurxo Chirro”.

O fetival non descoidará que celebra a súas vodas de prata con dúas actividades. Unha é unha mesa redonda na que programadores e especialistas falan sobre o papel do festival, e a outra é unha retrospectiva sobre filmes que deixaron pegada ao longo destes vinte e cinco anos de historia.