Clásicos independentes

“Tócache!”. Este é o eslogan da XVI edición do Festival de Cine de Ourense e toda unha declaración de intencións do que pretende ser este certame que abre as súas portas ao público o vindeiro venres. “O público é o auténtico leitmotiv, sen el non sería posible, e para el acometemos unha reestruturación dos ciclos, sección e demais programación ” asegura Diego G. López, voceiro dun festival que este ano se estrea sen director.

Os 188 títulos que compoñen a totalidade das producións que se exhiben na XVI edición do Festival de Cine de Ourense organízanse este ano dun xeito diferente. “Tratábase de facer unha programación máis accesible ao espectador, que tivera máis oportunidades de ver as películas grazas a unha redución no numero de horas de proxección e na diversificación de espazos” explica Diego González. Nesta ocasión, os espazos asócianse a proxectos concretos, de tal xeito que o Museo Municipal exhibirá aqueles produtos audiovisuais e que están feitos empregando novas tecnoloxías, o Teatro Principal acollerá sección especiais… “queremos que o público teña máis doado escoller que produción quere ver e que sala” explica o voceiro deste encontro. Así, a nova organización resúmese nos seguintes ciclos paralelos: Comedia, Igualdade, Visións de América Latina, Visións da Europa Atlántica e Panorama Galiza.

En todo caso, os títulos escollidos seguirán manténdose fiel aos sinais de identidade desta cita clásica no calendario de festivais galego. “O festival é un festival de cine independente, aínda que non estea esa etiqueta na denominación do encontro” explica Diego López. E este é, na súa opinión un principio irrenunciable.

Nesta ocasión, o Festival preséntase cunha particularidade que é o feito de non contar cun director. A destitución de Enrique Nicanor ao pouco de rematar a edición de 2010, falouse da desaparición da figura de director-xerente dentro do organigrama do Consorcio que mantén este festival de cinema. Desde entón, un comité de programación formado por catro persoas (Diego González López, Óscar Iglesias, Eugenio Antonio Pedraza Ginori e César Silva) dirixirá e organizará todo o encontro. “Funcionamos como o consello de administración dunha empresa, asegura Diego, que se reúne periodicamente e establece as liñas común de traballo”. O resultado deste traballo compartido poderase ver a partir do venres, cando a película A Voz dormida de Benito Zambrano que será a encargada de inaugurar esta edición.

A presenza do audiovisual galego
Este ano, por primeira vez en varias convocatorias, non haberá un título galego entre as producións que figuran en sección oficial competitiva na categoría de longametraxe. “Presentáronse moi poucas producións en relación co material que tiñamos nesa categoría, explicaba Diego González, e acontece que hai moitas producións galegas que poderían estar seleccionadas non chegaron a esta edición polos prazos que barallamos”. En todo caso, entre as 188 producións existen numerosas referencias galegas. “A nos programación está anegada, no bo sentido da palabra, de obras producidas aquí en Galicia, principalmente no que atende a documentais como en curtas” puntualiza. Canda elas, destaca da programación deste ano unha programación para celebrar o vixésimo aniversario da creación do Centro Galego de Artes da Imaxe (CGAI). Para iso, tal e como figura no catálogo, haberá unha sesión con obras realizadas por destacados realizadores galegos nos inicios das súas carreiras profesionais. Traballos de Carlos Velo (Finisterrae Galicia), Eloi Lozano (Retorno a Tagen Ata), Chano Piñeiro (Mamasunción), Xavier Villaverde (Viuda Gómez), Teo Manuel Abad (Contar) ou Jorge Coira (O matachín). Unhas sección que terán lugar o vindeiro 21 de outubro, case na clausura do encontro.

Encontros profesionais
Outro dos sinais de identidade do festival é o de servir de punto de encontro dos diferentes profesionais que se dedican ao sector e que en Ourense teñen lugar desde que existe o propio festival. Nese sentido, David González destaca o papel dos encontros profesionais neste 2011, que “vai enfocado a novos creadores e como poden desenvolver e darlle maior difusión as súas obras e ao traballo”. Para iso estará presente o avogado David Bravo, especializado en Propiedade Intelectual e nas novas licenzas; a creadora María Yáñez, que falará de cómo desenvolver contidos a través da rede e de cómo se difunde unha longametraxe; e responsables de Filmin, unha das distribuidoras on line máis populares. Canda iso, haberá encontros co público, así como espazos ao lado das salas Cine Box onde directores e actores poderán intercambiar opinión e impresións que ofrecerán e ensinarán dificultades. Cremos que con estas actividades máis encamiñadas á formación e outro a compartir experiencias, se completa o perfil desta edición” apunta o voceiro.

Con todo, Diego González explica que as expectativas para a edición que está a piques de comezar, pasan por “consolidar o festival como referente, e ao mesmo tempo, incrementar o número de espectadores”.