O sector propón, a axencia resolve

Só se presentaron dous espectáculos á convocatoria de axudas para financiar espectáculos de gran formato. E os que optaban a esa liña non acadaron a puntuación mínima esixida polo xurado. Así o confirmaban desde Agadic que publicou a semana pasada unha resolución de axudas que deixaba deserta esa convocatoria. Non son tempos para espectáculos de gran formato. Historias atractivas, monicreques e títeres e moita proposta infantil. Estas son as liñas xerais das produción escénicas que este ano reciben o apoio de Agadic.

“Hai que adaptarse a situación actual. E non é tanto que non poidas producir un espectáculo de gran formato (con cinco ou máis actores, cunha ampla escenografía e de gran tamaño) senón que despois non podes vendelo”. Así o explica Luma Gómez, integrante e creadora de Teatro do Noroeste, compañía que abandona os espectáculos de gran formato que estivo a facer nas últimas temporadas (Glass City, Imperial Café Cantante… musicais con seis e sete actores). O espectáculo que estrearán o vindeiro 14 de outubro no Teatro Jofre de Ferrol chámase Piratas e tal e como explica Luma é “unha historia bastatne convencional de piratas, que quedan sobreviven a un naufraxio mentres andan á procura dun tesouro”. A historia protagonizada por peronaxes moi recoñecibles do universo pirata: o capitán do barco (patachula), un pirata que leva un parche (ollovirollo), unha muller pirata e un grumete. “A historia serve tamén para abordar outros temas como o do ecoloxismo do medio mariño, xa que os propios piratas teñen que comer bolsas de plástico e outros refugallos que atopan no mar” asegura Luma. O texto é de Eduardo Alonso, a escenografía e escenario é de Conesa. É unha recuperación da liña infantil coa que Teatro do Noroeste xa ten traballando noutras producións como Romeo e Julieta, aínda que desta volta trátase dunha coprodución cunha compañía de nova creación Chiripa, coa que Eva Alonso se adentra no sector. A de Teatro do Noroeste é a contía máis alta dunha liña de subvencións de medio fomato na que Quique Peón bailará as fábulas das mouras con sete bailaríns sobre o escenario en Alendacroa (que recibe 12.713,60 euros), ou Teatro do Atlántico prepara ER (algún día traballaremos xuntas) que estreará en Narón o vindeiro 7 de outubro.

As novas e as pequenas
Seis compañías de recente creación recibirán subvencións para os seus primeiros proxectos. Entre eles destaca Redrum Prod.SL, que despois da súa primeira obra A pensión repite experiencia e cambia a súa liña de traballo no eido do terror e do misterio para preparar unha comedia. CHámase Moito Conto mestura de distintos contos coñecidos por todos ao contar a historia de dous irmáns que, enganados pola súa madrastra acaban perdidos no bosque, vivindo unha aventura que os cambiará para sempre. Esta produción, estreada en maio no Salón Teatro de Santiago, contou no seu momento co apoio de Sogama, ao defender o medioambiente como protagonista indiscutible e promover o uso de tecnoloxía LE, materiais ecolóxico e a reciclaxe. Agadic apoia este proxecto con 4.794 euros. Pola sua banda a compañía de Jorge Manuel Rey, presenta un segundo espectáculo con Hamlet. “Trátase de recuperar o teatro shakesperano para público novo, cunha obra cuxo texto foi adaptado por Alfredo Conde e contará cun único actor no escenario” asegura o seu creador. A proposta chegará aos escenarios a finais deste mes de setembro. Rey continúa vencellado a Títeres Cachirulo, que prepara Cu Cú, Tas Tás, co que se adentran por primeira vez cun espectáculo dirixidos e nenos menores de tres anos. “É un xogo de contrastes a través de aventuras pensados para o público máis pequeño de todos” asegura o propio Rey. A distribución deste espectáculo tamén variará con respecto ao que tiñan feito con anterioridade, porque segundo explica Jorge Manuel Rey, “precisará dun número menor de asistentes e, como ten menor duración, pemitirá facer máis funcións”. O proxecto de Títeres Cachirulo recibe 29.300 euros, a contía máis elevada da liña de axudas a produción de espectáculos de pequeno formato.

Marabillados pola lingua dos canteiros, Viravolta títeres encargoulle a Francisco Rozados, Rochi, desenvolver “un guión dun proxecto escénico que permitirá aos nenos de maís de nove anos achegarse a ese idioma especial”, explica o responsable da compañía, Anxo García. A diferencia do que acontece con outras producións escénicas, o resultado aínda está en marcha, e nas súas previsións está estrear en outubro este espectáculo. Entre as decisións a tomar para esta compañía que leva anos trasladando ao universo das marionetas espectáculos moi enraizados na cultura popular. Para facer O Arxina eo felo Viravolta recibe 24.119 euros.

Para outubro tamén está previsto que Berrobambán estree A folla máis alta o espectáculo para público infantil que, xunto coa montaxe para maiores, Avestruz en Terra Allea, poñen en marcha o Proxecto contatrás. No fondo estas dúas propostas dirixidas por Paula Carballeira pretenden facer unha conta atrás cara o adulto que levamos dentro desde pequenos.

Moitos espectáculos para público infantil a cargo de teatro de autores, marionetas ou monicreques fan parte do listado de proxectos financiados con cargo as axudas para industrias culturais previstas para a vindeira temporada escénica.