Analizará vinte puntos de áreas marcadas en investigacións anteriores

Dirixidos polo arqueólogo Miguel San Claudio Santa Cruz, hoxe comezaron no Porto de Fisterra os traballos de prospección arqueolóxica subacuática e de cartografía dos xacementos arqueolóxicos localizados na ría de Corcubión. Estes traballos examinarán polo menos 20 puntos de áreas que xa están marcadas de investigacións anteriores e terán como obxectivo documentar parte dos pecios da flota de 1.596, dos que se teñen localizado ao redor de seis naufraxios da flota ao mando do adiantado de Castela Martín de Padilla.

Esta actuación insírese no convenio de colaboración asinado entre a Xunta de Galicia e o Ministerio de Cultura para o desenvolvemento do Plan Nacional de Protección do Patrimonio Cultural subacuático. No marco desta actuación inclúense as prospeccións na ría de Vigo sobre os pecios da chamada Batalla de Rande, que se inciarán a vindeira semana.