Os pequenos como protagonistas

Coas vacacións ás volta da esquina, as diferentes entidades ultiman as presentación das súas propostas para encher de contidos adecuados estes tempos. Con formato de curso, campamento, obradoiros ou ciclos, as programacións oriéntanse a entreter a grandes e pequenos con produción propia. Revisamos algunhas desas propostas.

No verán, os diferentes espazos da cidade son escenarios axeitados para facer deporte, roteiros, mirar cara o ceo ou ver cinema nas rúas. Aínda que cada axente cultural, busca chiscarlle o ollo ao seu público obxectivo, as orientacións son máis ben familiares.

Dos concellos ás fundacións, pasando por outros exentes
A Fundación Barrié aproveita dúas das exposicións que ten en marcha nas súas sedes (Ricard Terré. Obras Maestras, en Vigo, y La morada del hombre. Fotografías de la Colección Martin Z. Margulies, en A Coruña) para presentar un programa titulado Verán fotográfico. Baixo este título hai un conxunto de actividades didácticas gratuitas para todos os públicos que inclúen campamentos semanais durante todo o verán, visitas guiadas abertas a grupos e a público en xeral. Non precisa de inscrición previa.

Ata o 24 de xuño está aberto o prazo para apuntarse na Nanonasa, un orixinal campamento no que poderán construír instrumentos musicais, crear películas ou facer rosquillas, filloas ou outros aperitivos. Destinado a nenos de ata 11 anos poderán tamén realizar a visita a O fogar do meu burro de la Fundación Ecomaia, creado para ofrecer actividades medioambientais e terapias asistidas con asnos para persoas con necesidades especiais.

O concello de Santiago renova unha vez máis o seu programa Vive o verán para promover 85 actividades ao aire libre destinadas a público de todas as idades. Prazas, rúas, parques, centros socioculturais e centros de interpretación ambiental serán os escenarios destas actividades de aprendizaxe, deporte, cultura e lecer. Taichi, danza Bollywood, visitas guiadas por espazos naturais son algunhas das propostas preparadas para combater a calor. O de Lugo, acaba de por en marcha unha nova edición do seu programa de educación viaria para rapaces. Un proxecto que cumpre catorce edicións e que ensina a nenos de entre 8 e 16 anos a andar en kart, bicicleta e ciclomotor.

Outra entdidade que acaba de abrir a reserva de praza das súas actividades é o Museo de Belas Artes da Coruña, que nesta presenta unha actividade de verán para explorar as obras do Museo e promover a creatividade e a experimentaciónplástica. Liñas, formas e cor con pincel conforman a programación deste obradoiro que se desenvolve no mes de xullo.

A oferta universitaria
Non podía faltar a programación tradicional para universitarios (e público en xeral) das tres universidades. Preto dun centenar de cursos espallados por toda a xeografía e no que hai propostas de diferente calado. Por exemplo, no museo de Lugo desenvólvese A Arte Galega que preténdese dar unha visión da arte galega (dende o Paleolítico ata os tempos actuais) con especial incidencia nas manifestacións artísticas existentes en Lugo e, máis concretamente, no Museo Provincial de Lugo. Nesta edición o curso dedícase á arte de finais do século XIX e primeiro terzo do XX en todas as súas manifestacións: pintura, escultura, arquitectura, enxeñería, artes menores (pratería), sen esquecerse tampouco das manifestacións da arte popular representada polos cruceiros. En Lugo, a USC tamén organiza outro programa que pretende analizar en clave galega unha efeméride, como é o ano internacional dos bosques (do 19 ao 22 de xullo). En Guitiriz, diferentes expertos e estudosos abordarán o roteiro da auga nesta zona (18-19 de xullo); no Courel estudarán o patrimonio desta zona (do 5 ao 7 de setembro) e en Vilagarcía as particularidades da camelia (15 e 16 de setembro).

Pola súa banda, a Universidade da Coruña conta con propostas tamén moi variopintas para os seus universitarios. Na programación deste verán hai espazo para o cinema. Baixo o titulo “Escritas Cinematográficas entre a Experimentación e a Industria” diferentes expertos tratarán de achegarse ás escritas de cineastas e ver como manteñen un complexo equilibrio entre o cinema de "autor", a experimentación e a súa inserción nunha industria cinematográfica moi conservadora. David Lynch, Atom Egoyan, Richard Linklater, Gus van Sant, Takeshi Kitano ou Jaime Rosales son algúns dos casos que se estudarán neste curso. A literatura de Manuel Rivas (do 11 ao 15 de xullo), a xestión do talento universitario (do 11 ao 13 de xullo), máis as vivenda e os espazos de relación nos núcleos tradicionais de Galicia (do 4 ao 8 de xullo) son algunhas das propostas desta universidade.