Os carreiros creados de xeito espontáneo protagonizan o traballo creativo de Ismael Teira

Os camiños que se crean polo paso continuado da xente para atallar por un lugar. Un elemento tan común e ao tempo tan inadvertido do noso espazo urbano é o que artella o proxecto Rede de atallos de Ismael Teira. Desde 2008, este artista veu documentando este tipo de trazados en Santiago de Compostela, considerando a acción da xente ao atallar como unha auténtica performance colectiva e a formación dos camiños como un tipo de creación. Agora, o libro Camiños de desexo, publicado polo colectivo Baleiro, compila unha serie de imaxes destres trazados. Ao tempo, a Galería Metro acolle unha exposición de fotografías, que se poñen á venda nunha serie limitada. Ademais, este creador dispoñibiliza na rede un mapa coa localización destes particulares espazos.

Segundo explica o proxecto naceu a finais de 2008. Foi un día, percorrendo un destes atallos, que ollei atrás e pareceume xenial a idea de que a xente fixese isto sen deseños previos, sen líderes, de xeito espontáneo. A obtención dunha axuda do Instituto de la Juventud permitiulle a Teira iniciar un exhaustivo proceso de documentación que agora ve a luz na forma de libro. A idea era facer un arquivo, amosar todo o que recollera. O proceso de documentación consistiu basicamente en realizar moitos paseos pola cidade fotografar cada un destes atallos e xeolocalizalos. Ao marcalos no google maps pode calcular tamén a lonxitude deste conxunto de atallos, na cidade poden ser uns cen metros de camiño en total, repartidos entre 39 ou 40 trazados.

Aínda que de cara ao futuro pretende continuar a traballar encol da arte e da paisaxe, Teira non pretende polo de agora continuar con este proxecto, aínda que non descarta recuperalo no futuro. O mapa destes camiños é mutable e cambiante. Cada vez xorden máis atallos, e mesmo algúns deixan de ter o seu emprego e voltan a se cubrir de herba, por exemplo cando se fai un camiño mellor nas proximidades. E logo hai casos nos que as institucións se decatan de que o atallo é moi efectivo, e entón póñenlle asfalto ou pedra e vóltano un camiño oficial, explica. Ao mellor nuns anos volto a facer este mapa para ver como mudou, xa desde que comezou houbo moitos cambios.

Mapa de Camiños de Desexo

Visualizar o mapa ampliado