Guía rápida para activar a poesía

Hai unha proposta de estrutura do evento que comeza pola lectura do "Manifesto Loisista", unha identidade corporativa deseñada, pero pouco máis: o resto vai na imaxinación dos organizadores. Xosé Manuel Pereiro e Manuel Rivas propoñen a descentralización de Vento Lois, o evento que se celebrou previamente o 20 de marzo na Coruña, para que calqueira o poida organizar o día 12 de maio ás 20 h.

"Solicitamos a túa colaboración", indican os organizadores, "por se podes argallar ou contribuír a argallar calquera acto, institucional ou persoal, en calquera lugar –bar, praza, monte, praia, recinto cultural- para ese día e esa hora", indican Pereiro e Rivas nunha convocatoria. No web de Lois Pereiro habilitarase un espazo para informar de todas as convocatorias e recoller as participacións.

Non é habitual no Día das Letras Galegas o practicar este tipo de eventos descentralizados moi conectados cos xeitos modernos de activismo e difusión cultural, desde as charlas TED ata os eventos convocados por Anonymous. Logotipos e imaxe corporativa, unhas poucas mensaxes centrais, moita comunicación e difusión pola rede, e a filosofía de traballo colaborativo e descentralizado, sen control sobre os discursos pero en sintonía entre si.

Pereiro e Rivas suxiren unha escaleta que comeza coa lectura do "Manifesto Loisista", que é unha escolma da Modesta proposición para renunciar a facer xirar a roda hidráulica dunha cíclica historia universal da infamia, de Lois Pereiro e continúa cun recital, unha lectura participativa de poemas de Lois, outro tipo de intervencións e remata con música. O web de Lois Pereiro concentrará todo o material producido o 12 de marzo "e logo xa se verá".