Ialma celebran con Simbiose o seus 10 anos de traxectoria musical

As belgas de orixe galega Ialma publican hoxe Simbiose (Fol Música) o que é o seu cuarto traballo co que ademais celebran o seu décimo aniversario como formación. As cinco cantareiras fillas da emigración galega usan de novo as súas raíces culturais musicais como base para este disco no que tamén achegan outras influencias musicais modernas na procura dun traballo diferente e especial con respecto aos anteriores. Nos doce temas que integran Simbiose poden atoparse sons tradicionais galegos mesturados con rap, música medieval ou pop e a colaboración do 10 artistas galegos de 10 disciplinas que pechan o círculo dos seus 10 anos de traballo conxunto. Así contan coa colaboración do escritor Xavier Queipo, o rapeiro El Puto Coke, Uxía e Quique Peón entre outros. Ialma son Nuria Aldao, Natalia e Verónica Codesal, Magali Menéndez e Marisol Palomo.