San Andrés de Teixido agochaba murais do século XVI

As obras de acondicionamento exterior do santuario de San Andrés de Teixido revelaron a existencia de pinturas murais ocultas neste edificio. Os frescos, que se atopan detrás do retablo do altar maior, están datados do século XVI e son da autoría de Pedro de Navarro. Nos mesmos represéntase o martirio de San Andrés con dous verdugos e suponse que orixinalmente habería representados máis personaxes. Segundo o arqueólogo Emilio Ramil, que coordina os traballos na capela, é posible que a pintura sexa mesmo anterior ao período sinalado, visto o estilo arcaicante das figuras.