O VI Premio Castelao de Banda Deseñada, que organiza a Deputación da Coruña ten xa gañador. Brais Rodríguez levará os 6.500 euros de premio pola súa obra A man do diaño, que será tamén publicada a cargo da institución. Segundo explicou Miguelanxo Prado, comisario do certame, Rodríguez presenta unha historia utópica e ucrónica na que fai un alegato contra as guerras empregando un estilo que emparenta coa máis recente BD europea.
O presidente da Deputación da Coruña, Salvador Fernández Moreda, tamén entregou o pasado sábado os galardóns correspondentes ao certame de cómic A medias que se convocou con ocasión do día da muller traballadora. Begoña Sanz Fonseca (1993) fíxose co primeiro premio, consistente nun ordenador portátil e un lote de libros. Xulia Pousa Dorado (1994) e Jesús Blanco Castro (1994) levaron cadanseu lote de libros no mesmo certame.
