Nel Vidal, presidente da Coordinadora de Traballadores de Normalización da Lingua

Unha das voces máis destacadas na defensa da lingua como presidente da Coordinadora de Traballadores de Normalización da Lingua, Nel Vidal foi tamén organizador da feira Cultur.gal na súa edición de 2007. Agora, explícanos como vive Culturagalega.org

¿Cando coñeciches o portal? Que impresión che causou?
Non lembro como o coñecín, estou seguro que nos inicios, pero non estou seguro tanto. Pareceume que viña cubrir unha necesidade en información cultural moi urxente. Que iso se fixese desde unha institución nom me pareceu que puidese ofertar as máximas garantías para a información. Pero co tempo o portal demostrou que malia a ser información feita desde unha institución non é información institucional, senón que está presentada dun xeito normal e atractivo.

¿Como o ves na actualidade?
Nesa liña avanzou moito a nivel de contidos e de deseño, adaptándose aos novos tempos pero mantendo a perspectiva do comezo.

¿Que pensas que lle falta?
Sei que é o que falta pero non estou certo de que teña que ser aquí. Cómpre unha grande axenda cultural. Culturagalega.org conta cunha importante axenda de actividade cultural pero penso que está enfocada de máis cara a cultura máis institucional. Non recolle toda a actividade que hai no país, sobre todo a nivel local ou comarcal e a nivel de colectivos, asociacións e demais. Esa grande axenda falta, pero non estou certo de que iso sexa labor de culturagalega.org

¿Hai algún servizo que empregues habitualmente ou algún contido que lembres de xeito especial?
O máis habitual e concorrido é a información de actualidade, tanto a propia como o Dosier de medios. Posiblemente é iso o que máis consulto. A nivel de lembranza, por ser o meu ámbito, venme á cabeza unha reportaxe sobre o traballo de normalización lingüística da administración local que saiu hai uns anos.