Morre a artista Ana Kiro

Era un dos rostros máis populares da televisión, aínda que comezou a súa carreira artística no mundo da música, onde editou máis de trinta discos. Ana Kiro (o seu nome real era María Dolores Casanova González) finou esta mañá no seu domicilio de Mera (Oleiros) por mor dun cancro que a mantivo apartada dos escenarios desde o ano 2006. A capela ardente cos seus restos quedarán instalados no auditorio Gabriel García Márquez de Mera.

A súa carreira musical comezou en Barcelona, onde vivía emigrada a súa familia. Cun contrato coa discográfica Belter fai numerosas xiras con cantantes de música lixeira e particpación de diferentes programas de televisión. Nunha xira a Galicia coñece a Manuel Muñioz, que adapta e lle cede o que será o primeiro éxito de Ana Kiro, Galicia, tierra maga. Con máis de 100.000 copias vendidas, permanece durante máis de tres meses nas listaxes de venda de toda España. Cando abandona a canción, a finais dos oitenta, vólcase na pequena pantalla. Foi a presentadora de varios talk shows vespertinos da TVG (Tardes con Ana e Toda unha Vida) e mesmo se atreveu como actriz na serie A miña sobra e máis eu.