Lugo prepárase para a súa 32 Semana Internacional de Cine de Autor

É a antesala do San Froilán e a cita de referencia do audiovisual en Lugo. A Semana Internacional de Cine de Autor cumpre a súa 32 edición presentando as tendencias, novidades e a realidade dos creadores e a creación. Ajami, A Caixa de Pandora, Déixame entrar, Cidade de vida e morte e Noite transfigurada conforman a sección oficial dun certame que mantén os seus tradicionais ciclos (infantil, muller curtametraxes…) aos que este ano se lle une un sobre o Xacobeo e outro sobre cine histórico ou de aventuras (peplum). O certame organizado polo clube fotocinematográfico lembra a figura a Enrique Muíño cunha exopsición de fotografía, conferencias e un ciclo de cinema.

Do 25 ao 30 de setembro comezará unha nova edición do Festival de Cinema de Lugo que se desenvolven en diferentes escenarios da cidade. Un dos nomes propios é o do arxentino de orixe galega Enrique Muiños, iniciado nos circuítos de teatro porteño que o fixo moi popular no país austral. Mesmo chegou, no marco da compañía Muíño-Alippi, a participar nunha xira en Galicia en 1922. Coa aparición do cinema sonoro, deu o salto dos escenarios á gran pantalla iniciando unha fulgurante carreira como actor (a súa filmografía conta con máis dunha vintena de títulos) e máis tarde como produtor (funda AAA, Artistas Argentinos Asociados). No Diccionario de Cine en Galicia dise del que “como actor representou o tipo rexo e viril do paisano maduro con gran compromiso entre a contención cinematográfica e a natureza expansiva do carácter arxentino”.