Recta final

Museos, asociacións, concellos e institucións culturais ultiman as programacións para o que resta do ano. En plena crise e coa celebración do Xacobeo, todos sacan forzas de flaqueza para que o ambiente cultural non decaiga. Un festival internacional de maxia, a exposición de Cristina García Rodero, primeira fotógrafa española na prestixiosa axencia Magnum, unha feira de teatro e as estreas cinematográficas do ano (en versión orixinal) marcan o último trimestre do 2010.

É unha das fotógrafas máis destacadas do panorama actual. Cristina García Rodero (Puertollano, Ciudad Real, 1949) é a única fotógrafa española integrante da prestixiosa axencia Magnum Photos. García Rodero presentará no CGAC, a partir do 29 de outubro unha exposición na que dará a coñecer a súa visión inédita de Galicia que fai parte do seu proxecto España oculta. Rituais, festas e acontecementos sociais onde o sagrado e o profano, a éxtase a melancolía, e o popular e o reudito se mestura nun misterioso relato dunha sociedade en plena transformación. A de García Rodero será unha das grandes exposición da temporada coa que abrimos este percorrido cultural polas programacións.

De congresos e feiras
Do 22 ao 26 de setembro A Coruña acollerá o XXX Congreso Máxico que levará a cidade 700 magos. Un programa que ofecerá actuacións públicas (rúas, colexios, bibliotecas hospitais…) xunto con conferencias, ciclos de cine e obradoiros. Unha cita que arrinca hoxe coa celebración dun ciclo de cinema que terá lugar na sede da Fundación Caixa Galicia.

A finais desta semana comeza a programación do Salón Teatro, un espazo xestionado polo Centro Dramático Galego, que protagoniza outra das citas da temporada: o vindeiro 26 de novembro estrearase Salomé a primeira montaxe do CDG capitaneado por Blanca Cendán, con Carlos Santiago como director. As artes escénicas terán unha cita imprescindible do 18 ao 21 de outubro na Feira das Artes Escénicas, na que se poderá ver a última aposta de Lagarta, Lagarta, Casting, a comedia; Sarabela Teatro, O incerto señor don Hamlet; Teatro de Ningures Homes… mulleres: o paraíso terrenal ou Talía Teatro, Volpone. Catro días nos que se concentra a produción teatral da temporada lista para programadores, exhibidores e olleadores.

Despois da visita do Centro Dramático Nacional, a compañía de baile (a Compañía Nacional de Danza, dirixida antes por Nacho Duato) visitirá Compostela (auditorio de Galicia) os días 2 e 3 de outubro para presentar un programa que aínda está por determinar.

Outono cinematográfico
Coa excepción de Curtocircuíto (adiantado no calendario ao mes de maio por parte da Concellaría de Cultura de Santiago de Compostela), o outono é un mes de cine por excelencia. Arrinca coa celebración do Festival de Cine de Ourense que terá lugar do 1 ao 9 de outubro. Unha cita na que se poderá ver desde a última película de Jorge Coira, 18 comidas ata a premiada en Cannes Lost persons aerea, de Caroline Strubbe pasando pola opera prima Here and there de Darko Lungulov. Ademais da sección oficial, o Festival de Cine conta con importantes e destacados ciclos paralelos que traerán desde o mellor da última edición do Fantasporto (Festival de Cine Fantástico de Oporto) ata unha escolma de filmes do director bengalí Satyajit Ray sobre obras de Tagore. Colle o testemuño cinematográfico Amal, o festival de cine Euroárabe que organiza a fundación Araguaney que do 23 ao 30 dese mes de outubro presentará unha escolma das mellores producións árabes (e doutras cinematografías centradas sobre o conflicto palestino). A cita cinematográfica pechará en novembro, con Cineuropa, onde se presentará unha escolma das mellores producións presentadas en festivais como Cannes, Venecia, San Sebastián, Berlín ou Valladolid (Seminci). Unha cita obrigada do calendario.

Deixando a un lado o aspecto cinematográfico, as grandes citas musicais desde ano xa tiveron lugar ao longo do verán, pero o final de ano depara pequenas sorpresas como o concerto co que A Reixa (en Santiago) quere festexar o quinto aniversario da súa tenda de discos. Mike Farris and The Roseland Rhythm Reve & The McCrary Sisters, presentados por Rober Bodegas, unha cita ineludible na Sala Capitol o vindeiro 8 de outubro.