O antes e despois duns petróglifos (e unha vila romana)

A voz de alarma deuna o Instituto de Estudios Miñoranos. No concello de Oia, nunha ampla zona de monte común que a Mancomunidade de Montes cedeu para unha explotación de kiwis, as obras executadas para a plantación arrasaron a semana pasada con dous importantes xacementos arqueolóxicos: un conxunto de petróglifos e un asentamento romano, ambos os dous catalogados pola Dirección Xeral de Patrimonio. O Instituto de Estudos Miñoranos xa presentou o venres unha denuncia a Seprona, o servizo de protección de medio ambiente e patrimonio da Garda Civil, e as obras están paralizada. Pero o petróglifo e o asentamento romano tamén.

Os petróglifos, ubicados no Campo do Sobreiro, resultaban singulares en Galicia por dous motivos combinados: eran dos poucos realizados en xisto (a maior parte deles están executados en laxes graníticas) e en vertical. Como se pode apreciar nas fotos, teñen motivos circulares. Os traballos para a preparación da enorme explotación de kiwis, que abranguen unha extensión de 180.000 metros cadrados, tamén arrasaron cun xacemento romano ubicado na zona de Boa Ventura. Os membros do Instituto localizaron na área diferente material arqueolóxico, como o chanzo dunha porta (na que se pode apreciar a fenda da bisagra), anacos de ánforas, instrumental e material lítico diverso que foi entregado á Garda Civil.

Patrimonio Cultural abriu un expediente ante a agresión e ordeou ao Concello a paralización inmediata da obra. Pero o alcalde, Alejandro Rodríguez, incumpriuna. "O único que pode paralizar a obra é o alcalde e non o fixen porque Oia ten que mirar ao futuro, non ao pasado, e unhas pedras non poden ser obstáculo", dixo o alcalde, do PP, en declaracións a La Voz de Galicia.