O proxecto Toromelos achega as obras de Carlos Casares ás táboas

Imaxe de <i>Lela anda en bicicleta</i> — Imaxe de *Lela anda en bicicleta*

Achegar aos máis pequenos o universo de Carlos Casares e mais ofertar unha proposta escénica en galego para estas idades. Estes son os obxectivos do Proxecto Toromelos, unha iniciativa nada da fundación que leva o nome do escritor, co apoio da Secretaría Xeral de Política Lingüística e en colaboración coa Escola Superior de Arte Dramática de Vigo. Precisamente este último organismo é o responsable da posta en escena de Lela anda en bicicleta, a obra de teatro que dá comezo a esta iniciativa e que se poderá ver en diferentes localidades do noso país. Gustavo A. Garrido, director da fundación, explícanos polo miúdo esta iniciativa, que ten visos de continuar nos vindeiros anos.