O concello de Padrón acolleu onte unha xuntanza con representantes dos concellos do Grove, Cambados, Vilagarcía, Rianxo e Catoira xunto cos responsables de varias empresas privadas de navegación turística, a Federación Galega de Cultura Marítima e Fluvial, o Clube Náutico de San Vicente do mar e os Cabaleiros da Ruta Marítima. O obxectivo é crear un convenio para promover un novo roteiro turístico que recree a Traslatio (o traslado) dos restos do Apóstolo desde a entrada da Ría ata Padrón que acade carácter oficial no seu recoñecemento.
O proxecto pasa porque en cada un dos concellos arousáns e do Ulla ata Padrón haxa portos de atraque para os barcos que fagan este roteiro. Hai dúas navieiras turísticas da Arousa que van ofrecer o itinerario. Cada concello sería responsable de cuñar a credencial en cada unha das sedes de parada.
Xa existe na actualidade unha itinerario marítimo Ruta fluvial Mar de Arousa - Ulla recoñecido como itinerario xacobeo. Durante a xuntanza, o tenente de alcalde de Padrón, Eloy Rodríguez, insistiu en convidar á participación da asociación da Ruta Fluvial Mar de Arousa - Río Ulla.
